شيل وحمل كلـه دين
بقلم الأستاذ/ أيمن خليفة
قولى أخر الخط فين
ف المقابر وأنت عابر
بس طماع حبتين
شيل وحمل كله دين
لملم الدنيا ف حجرك
الشيطان بيجر رجلك
الطريق رح يتعوجلك
و أنت أعمى بألف عين
شيل و حمل كله دين
دوس فى حق الخلق دوس
أفترى وأجمع فلوس
وأما تصحى من الكابوس
مش ح تلحق ركعتين
شيل وحمل كله دين
خون و خالف ف الوعود
خوض ف عرض الخلق خوض
هات ربابة و ناى و عود
روح بلاش ف الكلمتين
شيل وحمل كله دين
زيد غباوة و زيد ضلال
و أمشى ف السكة الشمال
اللى حمل واللى شال
ورثه راح ف الدعوتين
شيل وحمل كله دين
شيل وحمل ف الكراسى
شيل وزود ف المعاصى
و أكسر الرقم القياسى
شيل وحمل صحتين
شيل وحمل كله دين
شيل و حمل بس حاسب
بكرة ع المشاريب تحاسب
أخرة المال والمكاسب
قبر ضلمة وقطنتين
شيل و حمل كله دين
ليست هناك تعليقات:
إرسال تعليق